२०७७ फाल्गुण १२ बुधबार, नमोबुद्ध नगरपालिका(काभ्रेपलाञ्चोक)काभ्रेपलाञ्चोकको नमोबुद्ध नगरपालिकाले नगरका वडा कार्यालयको भवन निर्माणको कामलाई तीव्रता दिएको छ । नगरपालिकाका सबै वडामा पक्की भवन निर्माण गर्ने अभियानअनुसार अहिले सबै वडामा भवन निर्माणको काम तीव्र गतिमा अगाडि बढिरहेको हो ।नगर प्रमुख टङ्कप्रसाद शर्मा तिमल्सिनाले वडा नं ७ को कार्यालय भवनको शिलान्यास गर्नुभएपछि अब नगरको सबै वडाको कार्यालय भवन निर्माणको कामले तीव्रता पाएको छ । यसअघि उहाँले वडा नं ८ र ९ को कार्यालय भवन शिलान्यास गर्नुभएको थियो । अहिले नगरपालिकाका वडा नं ७, ८, ९ र १० को कार्यालय भवन निर्माणको काम भइरहेको छ । त्यस्तै वडा नं २ को भवन निर्माणका लागि पनि प्रक्रिया अगाडि बढाइसकेको नगरपालिकाले जनाएको छ । नगर प्रमुख तिमल्सिनाका अनुसार वडा नं २ को कार्यालय निर्माण यसै साता शुरु हुनेछ ।वडा नं २ को भवन निर्माणका लागि सिद्धिविनायक निर्माण सेवासँग रु ४० लाख ८७ हजार ६८५ मा ठेक्का सम्झौता भएको नगरपालिकाका इन्जिनीयर उज्ज्वल अर्यालले जानकारी दिनुभयो । वडा नं १ र ५ को भवन निर्माणको लागि प्रक्रिया अगाडि बढाइसकेको नगरप्रमुख तिमल्सिनाको भनाइ छ । उहाँका अनुसार नगरका ११ वटाका वडा कार्यालय एउटै डिजाइनमा निर्माण हुनेछ । यसअघि निर्माण थालिएका वडा नं ३, ६ र ११ का वडा कार्यालय भवनको निर्माण सम्पन्न भइसकेको जनाइएको छ । नगरप्रमुख तिमल्सिनाले ऐतिहासिक क्षेत्र दाप्चाको संरक्षण, सडक स्तरोन्नति र कालोपत्र गर्ने काम जनप्रतिनिधि आएपछि शुरु भएको र यसले दाप्चा क्षेत्रको मुहार परिवर्तनमा उल्लेखनीय योगदान गर्ने अपेक्षा गर्नुभएको छ ।महिलालाई सीप विकास तालीमनगरपालिकाका विभिन्न वडाका गरी ३० महिलाले व्यवसाय सञ्चालन गरेर आर्थिक उपार्जनमा लाग्नका लागि छ दिने सीप विकास तालीम लिएका छन् । यही फागुन ६ गतेदेखि नमोबुद्ध–११ मा रहेको एकल महिला भवनमा सञ्चालन गरिएको तालीममा नगरपालिकाभित्रका विभिन्न क्षेत्रमा संलग्न महिलाको सहभागिता रहेको थियो । तालीममा लप्सीबाट बनाइने परिकारलगायत पाँच प्रकारका परिकारको प्रदर्शनीसमेत गरिएको नगरपालिकाको महिला तथा बालबालिका शाखा प्रमुख तारादेवी सुनुवारले बताउनुभयो ।
