काेशी प्रदेश राज्य पुनर्संरचना गरी बनेका ७ प्रदेशहरू मध्ये एक हो । यस प्रदेशमा जम्मा २८ वटा प्रतिनिधिसभा निर्वाचन क्षेत्र र ५६ वटा प्रदेशसभा निर्वाचन क्षेत्रहरु रहेका छन् । संघीय संरचना बमोजिम यस प्रदेशमा १४ वटा जिल्लाहरू धनकुटा, भोजपुर, ताप्लेजुङ, पाँचथर, इलाम, संखुवासभा, तेह्रथुम, खोटाङ, सोलुखुम्बु, ओखलढुंगा, उदयपुर, झापा, मोरङ र सुनसरी रहेका छन् । नेपालको भौगोलिक परिस्थिति अनुसार यस प्रदेशको जलवायु एक स्थानबाट अर्को स्थानमा फरक किसिमको छ । यो प्रदेश तराइको समथर भूमिदेखि पहाड हुँदै उच्च हिमाली क्षेत्रसम्म पर्दछ । यस प्रदेशमा नेपालकै सबैभन्दा होचोभूमि केचना कवल झापा जिल्लामा पर्दछ भने सबैेभन्दा अग्लो चुचुरो सगरमाथा सोलुखुम्बू जिल्लामा पर्दछ । यस प्रदेशका प्रमुख नदीहरुमा मेची, कनकाई र कोशी पर्दछन् भने संरक्षित क्षेत्रहरूमा सगरमाथा राष्ट्रिय निकुञ्ज, मकालु बरुन राष्ट्रिय निकुञ्ज, कोशी टप्पु वन्यजन्तु आरक्षण, कञ्चनजङ्गा संरक्षण क्षेत्र आदि पर्दछन् । यो प्रदेश मूख्य रूपमा कृषि र पर्यटनमा आधारित छ । यहाँका अधिकांश मानिसहरु खेती र पशुपालनमा संलग्न छन् । यस क्षेत्रमा चिया, धान, मकै, गहुँ, आलु, कोदो आदि मूख्य आम्दानीको श्रोतको रुपमा रहेको छ । पहाडी जिल्लाहरुमा चिया तथा अलैंचीखेती पनि प्रमुख आम्दानीका श्रोतहरु हुन् । पूर्वी नेपाल अरु क्षेत्र भन्दा पर्यटन क्षेत्रको हिसावले धेरै प्रसिद्ध छ । यस प्रदेशमा सुन्दर पर्वत, नदी, उपत्यका र अन्य प्रसिद्ध ठाउँहरू छन् । पर्यटकहरुको लागि यस क्षेत्रमा पर्वतारोहण, बन्जी जम्पिंग, राफ्टिङ, पाराग्लाइडिङ आदि सुविधाहरु उपलब्ध छन् । यस प्रदेशका प्रमुख धार्मिक स्थलहरुमा सतासीधाम, अर्जुनधारा (झापा), बुद्धधाम, माईस्थान वा माईपोखरी, लारुम्बा, (इलाम), सिंहदेवी, गुप्तेश्वर महादेव, (पाँचथर), पाथीभरादेवी मन्दिर, (ताप्लेजुङ), विराटकाली, (मोरङ), बुढासुब्बा मन्दिर, बराहक्षेत्र, (सुनसरी), छिन्ताङ्ग देवी (धनकुटा), सिंहवाहिनी, (तेह्रथुम), सिद्धकाली, मनकामना, (संखुवासभा), सिंहकाली, चंडिस्थान, (भोजपुर), चौदन्डीदेवी, (उदयपुर), हलेसी महादेव मन्दिर, (खोटाङ), चम्पादेवी, (ओखलढुंगा), स्याङबोचे गुम्बा, (सोलुखुम्बु) पर्दछन् । यस प्रदेशमा संसारको सबैभन्दा ठूलो पर्वत सगरमाथा, संसारको तेस्रो उच्च पर्वत कञ्चनजङ्घा, संसारको चौथो उच्च पर्वत ल्होत्से, संसारको पाँचौं उच्च पर्वत मकालु पर्दछन् ।