साउन १६, सिन्धुपाल्चोक – बौद्व धार्मिक गुरु खेन्पो कमल भण्डारीले बाह्रबिसे नगरपालिकालाई पिसिआर मेसिन खरिद गरिदिने बताउनुभएको छ । खेन्पो भण्डारीले आज बाह्रबिसे नगरपालिका पुगेर यस्तो प्रतिवद्वता जनाउनुभएको हो ।बाह्रबिसे नगरपालिका मेयर निमफुञ्जो शेर्पाले खेन्पो भण्डारीले पिसिआर मेसिन खरिदका लागि बाह्रबिसे नगरपालिकालाई सहयोग गर्ने बचन दिईएको जानकारी दिनुभयो। उहाँका अनुसार नगरपालिकामा मेयर शेर्पा सहित उपप्रमुख शुशिला पाख्रिन लगाएतका जनप्रतिनिधिहरु संगको भेटमा खेन्पो भण्डारीले मेशिन खरिदका लागि आवश्यक पर्ने सम्पूर्ण खर्च व्योहोर्ने बताउनुभएको थियो ।नेपाल अधिराज्यभर कोभिड–१९ को पहिलो मृत्यु घटना सिन्धुपाल्चोक त्यसमाथि पनि बाह्रबिसे नगरपालिका भित्रै घटेको कारण खेन्पो भण्डारीले व्यक्तिगत तर्फबाट पिसीआर मेसिनको लागि सहयोग गर्न चाहेको मेयर शेर्पाले जानकारी गराउनुभयो । उहाँले मेसिन खरिद गरिदिने बचन दिनुभएको मेयर शेर्पाले बताउनुभयो । खेन्पो भण्डारीले नगरपालिकालाई एउटा चिनो तथा जनतालाई उपहारको रुपमा सहयोग गर्न लागेको बताउनुभएको थियो ।मेयर शेर्पाले खेन्पो भण्डारीले सञ्चालन तपाईहरु गर्नुहोस मेसिन चाँही म किनीदिन्छु भन्नुभयो कुरा प्रष्ट पार्नुभयो । ’खेन्पो भण्डारीद्वारा बाह्रबिसे नगरपालिकालाई उपहारको रुपमा यहाँका जनतालाई कोभिड–१९ जाँचमा सहज होस तथा कोरोना भाईरसबाट कोही पनि जनता अकालमा नमरुन भनेर यँही राख्न चाहनुभएको देखियो‘, मेयर शेर्पाले भन्नुभयो । तर उक्त मेसिन सञ्चालन गर्न निकै कठिनायी रहेको मेयर शेर्पाले बताउनुभयो । मेयर शेर्पाले मेशिन किन्नु भन्दा सञ्चालन गर्न सक्नु मूख्य कुरा भएको बताउनुभयो ।मेशिन जो सुकैले किन्न सक्ने तर व्यवस्थापन मूख्य चुनौति रहेको उहाँले बताउनुभयो । उहाँका अनुसार मेशिनबाट स्वाब परिक्षण पछि निस्किएको फोहोर व्यवस्थापन गर्न निकै चुनौति देखिन्छ । नब्बे जनाको समेत पिसिआर परिक्षण गर्न सकिने क्षमता रहेको उक्त मेशिन तीनजनाको गर्दा पनि उतिनै खर्च लाग्ने भएकोले स्थानीय तहको स्रोत साधनले नभ्याउने मेयर शेर्पाको तर्क छ । उसोत उक्त मेशिन प्रयोग गर्न केन्द्रीय सरकार तथा प्रदेश सरकारबाट अनुमित प्राप्त गर्नुपर्ने हुन्छ ।उक्त मापदण्ड पुरा गरेर राख्न सम्भव भएपछि मात्र खेन्पो भण्डारीलाई खरिद गर्न अनुमति दिने मेयर शेर्पाले बताउनुभयो । सो को लागि स्थानीय राजनीतिक दल, स्वास्थ्य शाखा तथा स्थानीय सरकारवालहरुसंग सरसल्लाहा भईरहेको उहाँको भनाइ छ । पिसिआर मेसिन किनिदिने खेन्पो भण्डारीको प्रतिवद्वतालाई भने बाह्रबिसे नगरपालिकाको तर्फबाट मेयर शेर्पाले धन्यवाद दिएको उपमेयर शुशिला पाख्रिनले बताउनुभयो ।उता जिल्ला जनस्वास्थ्य कार्यालय सिन्धुपाल्चोकले भने बाह्रविसे नगरपालिकामा पिसीआर मेसिन खरिद गर्ने कुरा चर्चामा आएपनि आफुलाई कुनै त्यस्तो जानकारी नभएको बताएको छ । जिल्ला स्वास्थ्य कार्यालयका प्रमुख दुर्गादत्त चापागाँईले आफूहरुलाई त्यस्तो आधिकारिक जानकारी नआएको र केही समयअघि सुनेका बताउनुभयो । मेसिन खरिद गर्नु अघि केन्द्रीय जनस्वास्थ्य प्रयोगशालाबाट अनुमति तथा मापदण्ड पुरागरेपछि मात्र परिक्षणको लागि अनुमति प्राप्त हुने उहाँले बताउनुभयो । त्यसपछि मात्र जिल्ला जनस्वास्थ्य कार्यालय सिन्धुपाल्चोकले आवश्यक समन्वय र सहजीकरण गर्न सकिने उहाँको भनाइ छ ।