चैत्र २१,काठमाडौं– नेपाल पत्रकार महासंघको विज्ञप्ती विवादमा परेको छ । महासंघका महासचिव रमेश विष्टले जारी गरेको विज्ञप्तीप्रति केन्द्रीय सदस्य स्वेता सिन्हाले असन्तुष्टि जनाएकी छन् । एक अनलाइनको समाचार डिलिट त्यसका डेभलपर कर्मचारीले गरेको विज्ञप्ती जारी गरेकोमा महासचिव विष्टले त्यसभन्दा पर पुगेर प्रधानमन्त्रीका सल्लाहकारको नाम जोडेका थिए । महासंघले पत्रकारिता सम्बन्धि कुनै पनि घटनाको आफ्नै ढंगले छानबिन गर्न सक्छ र अझ थप छानबिनका लागि माग गर्न पाउने भन्दै सिन्हाले छानविन र प्रमाण विना दोषी करार गर्नु महासंघको दुरुपयोग भएको आरोप लगाएकी छन् । ‘अनलाइन ह्याक गरेर डेभलपरले समाचारसँग जुन छेडखानी गर्यो त्यो कडा कारवाहीको भागिदार छ । यसमा पर्याप्त छलफल हुनु पर्ने थियो त्यो पनि भएन,’ उनले भनिन्, ‘पत्रकार महासंघले प्रकाशन गरेको विज्ञप्तिप्रति मेरो गम्भीर असहमति छ । विज्ञप्तिमा बेबसाइट नै ह्याक गर्ने डेभलपरलाई निर्दोष सिद्ध गर्न खोज्दै प्रमाण बिना प्रधानमन्त्री र उहाँको टिमलाई दोषी प्रमाणित गरिएको छ, यसमा नियत खराब देखिन्छ । पत्रकार महासंघ भित्र राजनीति गर्नुहुन्न । पत्रकारिताको हित बाहेक राजनीति गर्ने प्रयास हुन्छ भने त्यसको सामना गरिन्छ र गर्नुपर्छ ।’ विवाद के हो ? कसमश विश्वकर्मा, गोविन्द परियारलगायतले सञ्चालित काठमाडौंप्रेस डट कमले मेडिकल सामग्री खरिद प्रकरणमा उपप्रधानमन्त्री तथा रक्षामन्त्री ईश्वर पोखरेलसहितका उनका छोरा, प्रधानमन्त्रीका राजनीतिक सल्लाहका विष्णु रिमालसहित उनका छोरा र प्रधानमन्त्रीका आईटी विज्ञ अस्गर अली संलग्न भएको समाचार प्रकाशन गरेको थियो । अलीले समाचारमा आपत्ति जनाउँदै डिलिट गर्न दबाब दिएको काठमाडौंप्रेस डट कमले दाबी गरेको छ । समाचार डिलिट नगरेपछि अस्गर अलीसमेत संलग्न एफवान सफ्टको भागिनी कम्पनी सिरान टेकले समाचार हटाएको काठमाडौंप्रेस डट कमले आरोप लगाउँदै आएको छ । समाचार कसैको दबाबमा नहटाएको सिरान टेकको दाबी छ । त्यही प्रकरणलाई लिएर पत्रकार महासंघका महासचिव विष्टले प्रधानमन्त्रीको सचिवालयबाट काठमाडौं प्रेस अनलाइनमा प्रकाशित समाचार हटाउन दबाब दिनुका साथै हटाउन नमानेपछि अनलाइनको सेवा प्रदायक कम्पनीलाई दबाब दिएर उक्त समाचार हटाइएको आरोप लगाएका थिए । स्वास्थ्य सामग्री खरिदमा भएको अनियमिततासम्बन्धी समाचार प्रकाशित भएपछि प्रधानमन्त्री केपी शर्मा ओलीका राजनीतिक सल्लाहाकार र प्रेस सल्लाहाकारले समाचार हटाउन दबाब दिएको तथा हटाउन नमानेपछि सेवा प्रदायक संस्थालाई दबाब दिएर उक्त समाचार हटाउनुका साथै केही समय कुनै पनि समाचार पोष्ट गर्न नमिल्ने गरी अनलाइन अवरुद्ध पारिएको विज्ञप्तीमा लेखिएको थियो । प्रधानमन्त्रीका प्रेस सल्लाहकार सूर्य थापाले भने विष्टले आसन्न महासंघको चुनावालाई लक्षित गर्दै राजनीति गरेको आरोप लगाएका छन् ।