टुहुरा बालबालिकालाई मासिक २ हजार भत्ता

१ वर्ष अगाडि रासस

बैतडी, ३ भदौ ।बैतडीको दोगडाकेदार गाउँपालिकाले चालू आर्थिक वर्षदेखि विद्यालय उमेर समूहका टुहुरा बालबालिकालाई मासिक २ हजार रुपैयाँ भत्ता दिने घोषणा गरेको छ ।
टुहुरा बालबालिकालाई पढाईमा आर्थिक अभाव नहोस् भनेर भत्ता दिन लागिएकोे गाउँपालिकाका उपाध्यक्ष पार्वती कार्कीले बताईन् । ‘टुहुरा बालबालिकाले आमाबुबा गुमाएको महसुस नगरुन् र उनीहरुको पढाइमा कुनै पनि किसिमको समस्या नहोस भनेर भत्ता दिन लागेका हौं,’ उनले भनिन् ।
टुहुरा बालबालिकालाई दिइने भत्ताले बालबिवाह न्यूनीकरणमासमेत टेवा पुग्ने उपाध्यक्ष कार्कीको विश्वास छ । गाउँपालिकाले १८ बर्ष मुनिका टुहुरा बालबालिकाको तथ्याङ्क संकलन गरिरहेको जनाएको छ । गाउँपालिकामा रहेका सबै आठवटै वडाका वडा अध्यक्षलाई टुहुरा बालबालिकाको तथ्याङ्क सङ्कलन गर्न गाउँपालिकाले निर्देशन दिइसकेको छ । भत्ताका लागि गाउँपालिकाले महिला तथा बालबालिकाको बजेटबाट २ लाख ४० हजार रकम छुट्याएको छ ।