भक्तपुर, १८ फागुन-कर्णालीका स्थानीय तहले गाउँगाउँमा अस्पताल निर्माणको प्रक्रिया अगाडि बढाएका छन् । स्थानीय सरकार संचालन ऐन २०७४ मा सबै स्थानीय तहमा १५ शैयाको अस्पताल अनिवार्य निर्माण गर्नुपर्ने व्यवस्था अनुसार जुम्लाका दुई स्थानीय तहले अस्पताल निर्माण प्रक्रिया अघि बढाइसकेका छन् । कनकासुन्दरी र हिमा गाउँपालिकामा १५/१५ शैयाको अस्पताल बन्ने पक्का भएको छ । कनकासुन्दरी गाउँपालिकाको हाडसिंजा र हिमा गाउँपालिकाको कालिकाखेतुमा १५ शैयाको अस्पताल निर्माण प्रक्रिया थालिएको हो । हाडसिंजा इलाका स्वास्थ्य चौकी र हिमाको प्रथामिक स्वास्थ्य केन्द्र कालिकाखेतुलाई स्तरोन्नति गरी १५ शैया क्षामताको अस्पताल निर्माण गरिने छ । संघीय सरकारको ८० प्रतिशत र स्थानीयतहको २० प्रतिशत लगानीमा अस्पताल बनाउन लागिएको हो । हिमा गाउँपालिका अध्यक्ष रज बहादुर शाहिले भने, “१५ शैयाको अस्पताल निर्माण लागि पाँच हजार वर्ग्मिटर जग्गा आवश्यक पर्ने प्राविधिक स्टमेट छ । निःशुल्क रुपमा जग्गा उपलब्धताका लागि स्थानीयसँग छलफल भइरहेको छ ।” यता, कनकासुन्दरी गाउँपालिकाको हाडसिंजामा अस्पताल भवन निर्माणका लागि स्थानीयले ७ रोपेनी जग्गा निःशुल्क उपलब्ध गराएपछि अस्पताल निर्माणको बाटो खुलेको कनकासुन्दरी गाउँपालिकाका अध्यक्ष नरविर रावतको भनाइ छ । उनका अनुसार रवीलाल आचार्य र नाना आचार्य लगायत स्थानीयले झण्डै ३० लाख मूल्य बराबरको जग्गा अस्पताल निर्माणका लागि दान गरेका छन् । अस्पताल निर्माणका लागि गत माघ २८ गते स्वास्थ्य मन्त्रालयमा निर्माण प्रक्रियाको फाइल दर्ता भएको थियो । अस्पतालमा आवश्यक उपकरण आइसकेका छन् । जनस्वास्थ्य प्रयोगशाला टेकुबाट ४ लाख बराबरको ल्याबको सामान स्वास्थ्य चौकीमा पुगिसकेको छ । दैलेखमा ट्रमा सेन्टर निर्माण हुँदै कर्णाली राजमार्ग अन्तर्गत दैलेख जिल्लाको आठबीस नगरपालिकास्थित राकम कर्णालीमा एक सय शैयाको ट्रमा सेन्टर निर्माण हुने सम्झौता भएको छ । अस्पताल निर्माण गर्न कर्णाली स्वास्थ्य विज्ञान प्रतिष्ठान जुम्ला र आठबीस नगरपालिकाबीच शनिबार सम्झौता भएको हो । सम्झौतापत्रमा नगरप्रमुख खड्गराज उपाध्याय र प्रतिष्ठानका निर्देशक धर्मराज गोसाईले हस्ताक्षर गरेका छन् । अस्पतालको भौतिक संरचना निर्माण तथा सेवा सञ्चालन गर्न नगरपालिका र प्रतिष्ठानबीच द्विपक्षीय सम्बन्ध विस्तार गर्दै स्वास्थ्य सेवा प्रदान गर्न सहकार्य गर्ने सम्झौतामा उल्लेख छ । संघीय तथा प्रदेश सरकारसँग समन्वय गरी दुई पक्षले अस्पताल निर्माण तथा सञ्चालन गर्ने उद्देश्यले सहकार्य भएको प्रतिष्ठानका निर्देशक गोसाईले बताए । तत्काल सेवा सञ्चालन गर्न एक्सरे मेसिन, ल्यावका सामग्री तथा चिकित्सकको सेवा सुविधाको व्यवस्था नगरपालिकाले र चिकित्सक र अन्य स्वास्थ्यकर्मीको व्यवस्थापन प्रतिष्ठानले गर्ने छ । कारोबारका अनुसार ट्रमा सेन्टर निर्माणका लागि नगरपालिकाले १ सय ५ रोपनी जग्गा उपलब्ध गराएको छ । राकम कर्णालीमा निर्माण हुने ट्रमा सेन्टरबाट अछाम, दैलेख, कालिकोटलगायत कर्णाली प्रदेश र आसपासका जनताले प्रत्यक्ष लाभ लिन सक्ने छन् । प्रतिष्ठानले चिकित्सा शिक्षाअन्तर्गत एमबिबिएस र एमडीजिपी तहको पठनपाठनका लागि आवश्यक भौतिक एवं जनशक्ति तयार गरिसकेको छ ।