बैशाख २, काठमाडौं - सरकारले दश निजी वायुसेवा कम्पनीका ३३ वटा हेलिकोप्टर तयारी अवस्थामा राख्न परिपत्र गरेको छ । कोरोना भाइरस (कोभिड–१९)को संक्रमण फैलिन सक्ने भएकाले जुनसुकै वेला उद्धारमा खटिनुपर्ने हुन सक्ने भन्दै हेलिकोप्टर तयारी अवस्थामा राख्न परिपत्र गरेको हो । आइतबार उपप्रधानमन्त्री ईश्वर पोखरेल नेतृत्वको उच्चस्तरीय समितिको आग्रहमा नेपाल नागरिक उड्डयन प्राधिकरणले हेलिकोप्टर कम्पनीहरूलाई तयारी अवस्थामा रहन परिपत्र गरेको थियो । कम्पनीहरूले सोमबारदेखि नै तयारी अवस्थामा हेलिकोप्टरलाई राखेका छन् । आइतबार भारतीय तीन नागरिकमा कोरोना संक्रमण भेटिएको थियो भने थप सोमबार पनि एकजनामा संक्रमण देखिएसँगै १४ जनामा कोरोना संक्रमण देखिएको छ । सोसँगै सरकारले थप जोखिम बढ्न सक्ने भन्दै उद्धारका लागि हेलिकोप्टर कम्पनीहरूलाई तयारी अवस्थामा राखेको हो । परिपत्रसँगै हेलिकोप्टर कम्पनीहरूले पश्चिमको धनगढी, नेपालगन्ज र पूर्वमा विराटनगर तथा काठमाडौंमा हेलिकोप्टरहरू तयारी अवस्था राखेका छन् । निर्देशनअनुसार सबै हेलिकोप्टर कम्पनीहरूलाई परिपत्र गरिएको नागरिक उड्डयन प्राधिकरणका महानिर्देशक राजन पोखरेलले जानकारी दिए । ‘स्वाब संकलन तथा उद्धार र मेडिकल टिम जानुपर्ने सम्भावना भएकाले तयारी अवस्थामा रहन परिपत्र गरिएको हो,’ महानिर्देशक पोखरेलले भने । अहिले नेपालगन्ज र विराटनगर दुवै क्षेत्रमा हेलिकोप्टर तयारी अवस्थामा राखिएको छ ।सरकारकै आग्रहमा सबै हेलिकोप्टर कम्पनीहरूले तयारी अवस्थामा राखेको वायुसेवा सञ्चालक संघ (आयोन)का प्रवक्ता योगराज कँडेलले बताए । नयाँ पत्रिकाका अनुसार,‘सबै कम्पनीहरूलाई हामीले तयारी अवस्थामा रहन आग्रह गरेका छौँ, अहिले सबै तयारी अवस्थामै छन्,’ कँडेलले भने ।