२०७८ असार २५ शुक्रबार, काठमाडौं (बाग्मती प्रदेश)


कोरोना महामारीका कारण मुलुकको अर्थतन्त्र नराम्रोसँग थलिएको छ । वैदेशिक व्यापारमा समेत समस्या भइरहेका वेला कृषिजन्य उत्पादनको निर्यातमा भने उत्साहजनक प्रगति भएको छ । गएको आर्थिक वर्ष ०७६/७७ को ११ महिनाको तुलनामा चालू आर्थिक वर्षको सोही अवधिमा कृषिउपजको निर्यातमा उल्लेखनीय वृद्धि भएको हो । व्यापार तथा निकासी प्रवद्र्धन केन्द्रको प्रारम्भिक तथ्यांकअनुसार नगदेबाली अलैँचीको निकासीमा ९३.९ प्रतिशत, चियाको निकासीमा ७१.२ प्रतिशत र अदुवाको निकासीमा १६ प्रतिशतले वृद्धि भएको छ ।
गत आर्थिक वर्ष ०७६/७७ को जेठसम्ममा ४३ लाख ९ हजार ५ सय ३ किलो अलैँची निकासी भएको थियो । सो परिमाणमा अलैँची निकासी हुँदा ३ अर्ब ४६ करोड १० लाख ४२ हजार रुपैयाँ नेपाल भित्रिएको थियो । चालू आर्थिक वर्षको साउनदेखि जेठ मसान्तसम्ममा ८४ लाख ४८ हजार ९ सय ३७ किलो अलैँची निकासी भएको छ । यति अलैँची निकासी हुँदा ६ अर्ब ७० करोड ३७ लाख ८० हजार रुपैयाँ रकम प्राप्त भएको व्यापार तथा निकासी प्रवद्र्धन केन्द्रको तथ्यांकमा उल्लेख छ । मुलुकमा उत्पादन भएको अलैँचीको सबैभन्दा ठूलो हिस्सा भारतमा निकासी भएको छ । कुल निकासीको भारतमा करिब ९९ प्रतिशत र पाकिस्तानमा १ प्रतिशत अलैँची निकासी भएको छ । नेपालबाट भएको कुल निकासीको ५।५ प्रतिशत हिस्सा अलैँचीको छ ।
अलैँचीपछि निकासीमा उल्लेखनीय सुधार भएको नगदेबालीमध्ये चिया परेको छ । चियाको निकासीमा ७१.२ प्रतिशत वृद्धि भएको छ । आव ०७६/७७ मा ८३ लाख २५ हजार ७ सय ८७ किलो तयारी चिया निकासी भएको थियो । चियाको निकासीबाट अघिल्लो वर्ष २ अर्ब ६ करोड ५३ लाख ६८ हजार रुपैयाँ रकम नेपाल भित्रिएको थियो । यो वर्ष तयारी चियाको निकासी र यसबाट भित्रिने रकममा वृद्धि भएको छ । चालू आर्थिक वर्षको जेठ मसान्तसम्ममा १ करोड १० लाख ३६ हजार ४ सय ८६ किलो तयारी चिया विदेश निर्यात भएको छ । त्यसबाट ३ अर्ब ५३ करोड ६८ लाख ५७ हजार रुपैयाँ रकम नेपाल भित्रिएको छ । निर्यातमा करिब ३ प्रतिशत हिस्सा रहेको चियाको समेत सबैभन्दा बढी भारतमा नै निकासी हुने गरेको छ । भारतमा ८८.९ प्रतिशत र जर्मनीमा ३.६ प्रतिशत रहेको छ । त्यसबाहेक रुस, जापान, चेक रिपब्लिक, अमेरिका, क्यानडा, फ्रान्स, अस्ट्रेलियालगायतका देशहरूमा समेत चियाको निकासी हुने गरेको छ ।
त्यस्तै, अदुवाको निकासीमा समेत आशालाग्दो सुधार भएको छ । अदुवाको निकासी १६ प्रतिशत वृद्धि भएको छ । आव ०७६/७७ को ११ महिनाको अवधिमा ७६ लाख ८४ हजार ७ सय १६ किलो अदुवा निकासी भएको थियो । त्यसबाट ३६ करोड ५० लाख ८७ हजार रुपैयाँ रकम नेपाल मुलुक भित्रिएको थियो । तर, अहिले अदुवाको निकासी घटे पनि यसबाट प्राप्त हुने रकममा भने वृद्धि भएको छ । चालू आवको जेठसम्म ५५ लाख ७५ हजार ३ सय १२ किलो अदुवा निकासी भएको नयाँपत्रिकामा ख्खबर छ । यसबाट ४२ करोड ३४ लाख ३० हजार रुपैयाँ रकम आम्दानी भएको तथ्यांकमा उल्लेख छ । अदुवाको निकासी भारतमा करिब ८३ प्रतिशत, जर्मनीमा १३ प्रतिशत, बंगलादेशमा ३ प्रतिशत र अमेरिकामा १ प्रतिशत रहेको छ ।